MADINI YA BATI YATOROSHWA KWENDA NCHI JIRANI YA RWANDA

Kyerwa BUKOBA

Juni  19, 2014.

MADINI YA BATI YATOROSHWA KWENDA RWANDA

WANANCHI   wa Wilaya mpya ya Kyerwa Mkoani Kagera wameiomba Serikali kudhibiti Madini ya Til (Bati) yanayochimbwa katika Wilaya hiyo kutokana na baadhi ya Viongozi wa Madini Mkoani hapa kushirikiana na Wanyarwanda katika kuyatorosha Madini hayo kwenda nchi ya jirani ya Rwanda.

Wakiongea na Gazeti hili Wananchi hao walisema kuwa wamekuwa wakishangazwa na wimbi la Watu hao kutoka katika nchi ya jirani ya Rwanda kumimini katika mchimbo hayo kwa kudai kuwa hapa nchini hakuna soko wala mitambo ya kusafishia madini hayo ya Bati.

Walisema kuwa sehemu hiyo maarufu kwa jina la syndicate hapo siku za nyuma ilikuwa ikimiliwa na shirika la kutetea Wachimbaji wadogowadogo (STAMICO) kwa sasa limevamiwa na Wanyarwanda na kujimilikisha maeneo mbalimbali ya uchimbaji huku Watanzania wakinyimwa fursa hiyo na ofisi ya Madini Mkoa.

Mmoja wa Wanyarwanda hao ambaye yupo katika machimbo hayo tangu siku za nyuma Wabulungu Haruna alisema kuwa ofisi ya Madini Mkoa wa Kagera imekuwa ikitoa Vibali vya uchimbaji wa Madini hayo ya Bati kwa Wanyarwanda  huku akisingizia kuwa hakuna mtanzania anayeweza kufanya biashara hiyo kwani hapa nchini hakuna sehemu yenye mitambo ya kusafishia madini hayo.

Haruna alisema kuwa Madini hayo ya bati katika eneo hili yalikuwepo tangu siku za nyuma chini ya STAMICO lakini baada ya shirika hilo kujitoa ndipo Wanyarwanda hao walipoamia katika Kijiji hicho na kusingizia kuwa soko kubwa la Madini ya Bati lipo katika nchi ya Rwanda na sii Tanzania na hivyo kuwafanya wazawa kubaki kuwa madalali tuu.

“Tunaomba ofisi za uhamiaji Mkoa wa Kagera kuja katika eneo hilo kwani Wanyarwanda ni wengi sana wanaokuja kufanya biashara hii huku ikisemekana kuwa hawana vibali vya kuishi na vya kufanya Biashara hiyo ya madini hayo hapa nchini”, Alisema Wabulungu Haruna mchimbaji wa eneo hilo.

Kwa upande wake Afisa Madini Mkoa wa Kagera Arbogasti Kalist alipotakiwa kutoa ufafanuzi juu ya Suala hilo alisema kuwa kweli Madini ya Bati yapo katika eneo hilo lakini hakuna mtanzania yeyote liyejitokeza katika kuomba kibali cha kufanya shughuli za uchimbaji katika maeneo hayo.

“Pia ndugu Mwandishi Watanzania katika madini hayo waanatumika kama Madalali tuu kwa kuwa hapa nchini hakuna mitambo ya kuchenjua madini hayo na hivyo hali ambayo Wanyarwanda wana mashine hizo na kufanya biashara hiyo kuendeshwa na Wanyarwanda kutoka nchi ya jirani”, Alisema Afisa Madini huyo.

Pia alisema kuwa kuwa kuhusu majengo hayo ya Serikali kupangishwa Wanayarwanda Afisa Madini huyo alisema kuwa baada ya Kampuni ya Stamico kuondoka waliona kuwa majengo hayo yasibaki wazi na hivyo kuamua kuyapangisha Wananchi walipo katika eneo hilo wakiwemo Wanyarwanda hao.

Katika suala la Risiti Afisa huyo alisema kuwa waliingia mkataba na Kijiji kwa lengo la kugawana mapato yanayotokana na ushuru wa wachimbaji huku stakabdhi hizi feki zikiwa na mihuri inayooesha imegongwa kutoka katika ofisi za Madini za Mkoa.

mwisho